Skrifað af: Aldís Geirdal Sverrisdóttir | 25. Ágúst 2010

Kæru laganemar

Nú ættu greiðsluseðlar fyrir félagsgjöld í Lögréttu skólaárið 2010-2011 að vera komnir inn á heimabankana ykkar (ath að þið fáið ekki seðil sendan heim í pósti)

Innifalið í félagsgjöldum Lögréttu er:

Nemendafélagsskírteini sem gildir sem afsláttakort í ýmsum verslunum, skemmtistöðum og matsölustöðum. Allar upplýsingar munu koma undir flipann ,,Afslættir" á heimasíðu félagsins, innan skamms. Við bendum sérstaklega á samning okkar við Hvítu perluna en þar fáum við 20% afslátt af öllu auk frábærra tilboða á föstudags- og laugardagskvöldum.

Humarhátíð Lögréttu verður haldin 5. nóvember á Stokkseyri. Þetta er atburður sem enginn má missa af og fá félagsmenn Lögréttu forgang í miðasölu.

Árshátíð Lögréttu, verður haldin eftir áramót. Síðastliðin tvö ár hefur verið haldin sameiginleg árshátíð með öllum deildum en í ár verður endurvakin sú mikla hefð að halda sér laganemaárshátíð. Allir þeir sem upplifðu eina slíka á sínum tíma vilja ekki missa af því og þeir sem ekki hafa upplifað slíkt geta ekki leyft sér að missa af henni í ár. Aðgangseyrir verður lægri fyrir greiðandi meðlimi, en að sjálfsögðu allir velkomnir!

Vísindaferðir í helstu fyrirtæki landsins. Stjórnin bendir sérstaklega á að þetta árið verða einnig margir kokteilar á lögmannsskrifstofur sem verður einungis fyrir lengra komna nemendur.

Atburðir SFHR, svo sem grímuballið, jólaballið og Ólympíuleikarnir.

Skemmtikvöld, golfmót, óvissuferð nýnema, málfundir og ræðunámskeið.

Síðast en ekki síst er áskrift að Tímariti Lögréttu innifalið, sem er gefið út 2-3 á ári. Áskriftin kostar 3980 kr á ári, svo það marg borgar sig að skrá sig í Lögréttu!

- allt þetta fyrir einungis 5990 kr ! (og meira að segja 4490kr ef þú ert  í Arion banka, sjá neðar: )

Arion banki greiðir niður nemendafélagsgjöld um 1.500 kr. til háskólanema.

Til þess að eiga rétt á endurgreiðslu þarf nemandi að uppfylla eitt af eftirfarandi skilyrðum:

Vera með KORTIÐ + námsmannareikning

Vera í Vildarþjónustu bankans

Stofna til viðskipta sem gera hann að Vildarfélaga.

Stofna KORTIÐ og námsmannreikning.

Til að hægt sé að endurgreiða þurfa þjónusturáðgjafar í útibúi bankans að fá staðfestingu á að nemandi hafi greitt nemendafélagsgjald í formi kvittunar eða staðfestingar á greiddu félagsgjaldi. Staðfesting má vera útprentuð úr netbanka eða send á þjónusturáðgjafa í pósti.

Mikilvægt er að kvittun sé greinilega merkt viðeigandi nemendafélagi eða skóla.

Greitt verður inn á reikninginn í fyrstu viku október.

Við hvetjum að sjálfsögðu alla til að gerast meðlimir Lögréttu!

Með kveðju

Stjórnin

Skrifað af: Aldís Geirdal Sverrisdóttir | 24. Ágúst 2010

Föstudaginn 27. ágúst nk. verður farið í hina árlegu Þingvallaferð þar sem Sigurður Líndal mun leiða laganema í gegnum sögu Þingvalla eins og honum einum er lagið!

Að lokinni ferðinni með Sigurði verða hinir víðfrægu Lögréttuleikar haldnir. Þar verður keppt í nokkrum þrautum og sigurvegararnir fá vegleg verðlaun!

Á heimleiðinni verður hin árlega ræðukeppni haldin og sigurvegarinn verður krýndur Lögsögumaður ársins 2010. Ræðuefnið verður kynnt þegar nær dregur.

Boðið verður upp á léttar veitingar bæði í föstu og fljótandi formi! Mæting í Sólina kl. 15:45. Brottför er kl. 16:00 og áætlaður heimkomutími er kl. 20:00. Nánari upplýsingar má finna á www.logretta.is.

Um kvöldið verður svo haldið tryllt partí á Hvítu Perlunni með öðrum laganemum.

Fólk er hvatt til að klæða sig eftir veðri og hafa hlý föt með sér.

Skráning á myschool hefst miðvikudaginn 25. ágúst, kl. 11:00 og lýkur kl. 12:00 föstudaginn 27. ágúst. Einungis 40 komast í ferðina og eru laganemar hvattir til að skrá sig snemma.

Sjáumst á Þingvöllum!

Skrifað af: Benedikta G. Kristjánsdóttir | 20. Ágúst 2010

Sælir kæru laganemar!

Nú er sumrinu að ljúka og ný önn að hefjast hjá okkur, vonandi áttu allir frábært sumarfrí og náðu að hlaða batteríin aðeins fyrir veturinn. Stjórnin hefur ekki setið auðum höndum yfir sumarið, það er búið að endurnýja styrktarsamninga frá því í fyrra auk þess að leita að nýjum, en EJS, VÍS, NOVA og LEX munu halda áfram sem styrktaraðilar okkar í vetur en stjórnin hefur einnig gert minni samninga. Einnig  er hagstæður afsláttarsamningur við Hópbíla í höfn. Að lokum eru þau búin að betrumbæta þjónustusamning okkar við Arion Banka.

Árshátíðin okkar þetta árið verður með öðru sniði en síðustu tvö ár, þar sem í lok síðasta skólaárs var ákveðið að Lögrétta myndi halda sér árshátíð í stað hinnar sameiginlegu sem hefur verið síðustu tvö ár. Strax nú í upphafi haustannar má búast við því að óskað verði eftir öflugum sjálfboðaliðum í árshátíðarnefnd.

Þennan veturinn mun skemmtistaðurinn Hvíta Perlan vera aðal-skemmtistaðurinn okkar, ásamt öðrum nemendafélögum, en þau tilboð og afslættir sem við komum til með að fá hjá þeim verða sett inná síðuna okkar, www.logretta.is um leið og þau verða komin alveg á hreint. Hægt er að skoða skemmtistaðinn og þá afþreyingu sem boðið er upp á þar (t.d. Póker-herbergi og 3D flatskjáir) inná síðunni þeirra: www.hvitaperlan.is. En auk þess erum við með minni samninga við aðra skemmtistaði bæjarins

Síðast en ekki síst hefur stjórnin verið að setja saman mjög spennandi dagskrá fyrir komandi vetur og ættu hressir laganemar ekki að hafa neinar áhyggjur af því að þurfa að sitja aðgerðarlausir nokkurn einasta föstudag þessa önnina. Hver atburður fyrir sig verður auglýstur þegar að honum kemur, en ég ætla svona aðeins að stikla á stóru um fyrstu atburði vetrarins. Nýnemakokteillinn á Kjarvalsstöðum var haldinn núna á miðvikudaginn og var mjög vel sóttur, aðallega af hressum nýnemum, eldri nemendur létu sjá sig og svo að sjálfsögðu okkar frábæru kennarar. Veðurguðrnir ákváðu að vera okkur hliðhollir það kvöldið og úr varð mjög skemmtileg stemning úti í sólinni. Myndir frá kokteilnum koma inná Facebook síðu Lögréttu í vikunni en við hvetjum alla meðlimi Lögréttu til að 'Líka við' Lögréttu síðuna á Facebook ásamt því að vera duglegir að fylgjast með síðunni okkar: www.logretta.is, þar sem birtar verða fréttir af viðburðum vetrarins og myndir frá þeim, auk reglulegra pistla um störf stjórnarinnar í þágu nemenda.

Næst á dagskrá vetrarins er svo hin marg-fræga Tuborg útilega, sem er sameiginleg með öllum deildum skólans. Hún verður haldin núna á föstudaginn  í Álfaskeiði á Flúðum, miðaverð er 1.500 kr en innifalið í því eru rútuferðir báðar leiðir, grillaðar pylsur, fullt af skemmtiatriðum og að sjálfsögðu eitthvað til að væta aðeins kverkarnar eins og nafnið gefur til kynna. Hægt verður að nálgast miða í Sólinni í hádeginu á fimmtudag og föstudag.

Þann 27. ágúst er svo skipulögð hin árlega Þingvallaferð Lögréttu með Sigurði Líndal og hvet ég ykkur til að fylgjast vel með hvenær skráningin hefst, þar sem einungis verður um takmarkað sætaframboð að ræða!

Og að lokum, föstudaginn 3. september  verður óvissuferð nýnema. Þetta er eitthvað sem enginn nýnemi má láta fram hjá sér fara, en þessi ferð er frábært tækifæri til að kynnast árgangnum sínum og eignast fullt af vinum til að fylgja manni í gegnum þessi 5 frábæru ár sem þið verðið með okkur hérna í HR.

-Benedikta G. Kristjánsdóttir, fréttaritari Lögréttu.