Námið

LÖGFRÆÐINÁM FÆRT TIL NÚTÍMANS
Háskólinn í Reykjavík útskrifaði í fyrsta skipti lögfræðinga með fullnaðarpróf í lögum í júní 2007. Lögfræðingar með fullnaðarpróf frá Háskólanum í Reykjavík getur aflað sér réttinda sem málflytjandi og starfað sem dómari.

TENGSL VIÐ ATVINNULÍF OG RAUNHÆF VERKEFNI
Kennslan við Háskólann í Reykjavík hefur frá í upphafi verið frábrugðin hefðbundinni kennslu í lögfræði á þann hátt að tenging við atvinnulífið og nútíma samfélag er mun meiri en annars staðar. Mikið er lagt upp úr því í kennslu að vera með skírskotanir til veruleikans. Kennslan er miðuð að því að allt sem nemandinn læri hafi skírskotun til einhvers sem er raunverulega að gerast. Þetta er gert til að gera fólk að betri lögfræðingum, þannig læri það betur það sem það þarf að kunna og er fært um að beita því.

Grunnnám (BA)

BA í lögfræði 90 einingar, 3 ár.

NÝJAR ÁHERSLUR - MARKVISST NÁM
Á undanförnum árum hafa orðið verulegar breytingar á starfsumhverfi íslenskra lögfræðinga sem kalla á nýjar og markvissar áherslur í laganámi. Við lagadeild Háskólans í Reykjavík er í boði mjög metnaðarfullt og nútímalegt laganám sem miðar að því að útskrifaðir nemendur verði framúrskarandi lögfræðingar sem skipi sér í fremstu röð á sínu sviði. Námið samanstendur af 75 eininga kjarnanámi og 15 eininga vali.

Allir nemendur sem hefja nám við lagadeild HR byrja á 3ja ára (90 eininga) grunnnámi til BA-gráðu. Kennsla fer að hluta fram í fyrirlestrum og raunhæfum verkefnum en einnig í formi vinnu- og umræðufunda. Að grunnnámi loknu gefst nemendum kostur á tveggja ára (60 eininga) framhaldsnámi til meistaraprófs í lögfræði, ML.

BREIÐUR FRÆÐILEGUR GRUNDVÖLLUR
Í grunnnáminu er lagður mjög breiður fræðilegur grundvöllur með kennslu í öllum megingreinum lögfræðinnar. Leitast er við að tengja hina fræðilegu umfjöllun raunhæfum viðfangsefnum og verkefnavinna er mikil innan einstakra námskeiða og í sérstökum verkefnanámskeiðum.

RAUNHÆF VERKEFNI
Strax á 1. ári taka laganemar þátt í nýsköpunarnámskeiði sem heitir Nýsköpun og stofnun fyrirtækja. Námskeiðið er einnig skyldunámskeið hjá nemendum í viðskiptafræði og verkfræði og valnámskeið í öðrum deildum skólans. Markmið námskeiðsins er að nemendur læri að stofna fyrirtæki á grundvelli viðskiptahugmynda og viðskiptaáætlana sem þeir hafa sjálfir tekið þátt í að móta.

Á vorönn á 2. ári er námskeið sem leiðir nemendur í gegnum gerð flókinna viðskiptasamninga og málarekstur. Námskeiðið er byggt á úrlausn raunhæfra verkefna og tvinnar saman nokkrar af megingreinum lögfræðinnar. Á síðasta ári fengu nemendur að spreyta sig í málflutningi hjá Héraðsdómi Reykjavíkur.

Á vorönn á 3ja ári er nemendum gefir kostur á aukinni sérhæfingu innan lögfræðinnar í gegnum fjölda valnámskeiða. Ennfremur gefst þeim kostur á að velja námskeið á öðrum sviðum innan annarra háskóladeilda hér á landi eða erlendis (samtals allt að 15 ein.).

NÁM VIÐ AÐRA HÁSKÓLA
Heimilt er að fengnu samþykki lagadeildar að ljúka einingum við aðra innlenda háskóla eða erlenda háskóla. Gefst þeim kostur á að velja námskeið úr öðrum sviðum innan annarra háskóladeilda hér á landi eða erlendis.

KOSTNAÐUR
Skólagjöld fyrir skólaárið 2007-2008 eru 128 þúsund krónur á önn. Með skólagjöldum getur HR boðið nemendum framúrskarandi aðstöðu og aukið gæði skólastarfsins í heild. Nám við Lagadeild Háskólans í Reykjavík er námshæft hjá Lánasjóði íslenskra námsmanna.

ÖFLUGAR RANNSÓKNIR
Markmið lagadeildar HR er að efla rannsóknir á sviði lögvísinda. Til að svo megi verða þarf deildin að skapa kennurum og nemendum fyrsta flokks aðstöðu til rannsóknarvinnu m.a. á vettvangi þeirra rannsóknarstofnana sem starfa á vegum deildarinnar.

STOFNANIR OG MIÐSTÖÐVAR
Á vegum lagadeildar Háskólans í Reykjavík eru starfandi þrjár stofnanir og ein upplýsingamiðstöð. Evrópuréttarstofnun HR, rannsóknarstofnun á sviði Evrópuréttar tók til starfa haustið 2002 og á vegum EHR tók til starfa Miðstöð Evrópuupplýsinga sumarið 2003. Á 5 ára afmæli Háskólans í Reykjavík, 4. september 2003 var Auðlindaréttarstofnun, formlega stofnuð og þann 29. mars 2004 var Fjármálaréttarstofnun stofnuð.

Nemendum í meistaranámi gefst kostur á að starfa við þessar stofnanir í tengslum við meistaraverkefni og nemendum í grunnnámi að sérstökum verkefnum.

LÖGMANNAFRUMVARPIÐ VARÐ AÐ LÖGUM Í MAÍ 2004
Föstudaginn 28. maí 2004 samþykkti Alþingi frumvarp dómsmálaráðherra um breytingu á lögum nr. 77/1996 um lögmenn. Með hinum nýju lögum er m.a. mælt svo fyrir að sá sem sækir um réttindi til að vera héraðsdómslögmaður skuli hafa lokið fullnaðarnámi í lögfræði með meistaraprófi eða embættisprófi frá lagadeild háskóla sem viðurkenndur sé af menntamálaráðuneytinu samkvæmt lögum um háskóla.

Ljóst er að þeir sem ljúka grunn- og meistaranámi frá lagadeild HR hafa þar með lokið fullnaðarnámi í framangreindum skilningi og uppfylla því umrætt lagaskilyrði fyrir öflun lögmannsréttinda.

Meistarapróf - ML í lögfræði, tveggja ára nám (60 ein.)
Rannsóknartengt framhaldsnám
Áhersla á rannsóknir og verkefnavinnu

Meistaranám við lagadeild Háskólans í Reykjavík (HR) er 60 eininga nám. Almennt er gert ráð fyrir að námið taki tvö ár, þ.e. fjórar annir, en því ber að ljúka innan þriggja ára. Námið byggir að verulegu leyti á sjálfstæðri vinnu nemenda undir handleiðslu kennara og er sérstök áhersla lögð á rannsóknir og verkefnavinnu.

Framúrskarandi kennarar og fræðimenn
Kennarar í meistaranáminu, íslenskir sem erlendir, hafa verið valdir á grundvelli menntunar, starfsreynslu og hæfni til kennslu og rannsókna. Flestir þeirra hafa að loknu embættisprófi lokið framhaldsnámi í lögfræði við virta erlenda háskóla.

Í rannsóknartengdu námi er lykilatriði að njóta leiðsagnar kennara sem sjálfir hafa lokið vísindalegu rannsóknarnámi. Í hópi þeirra kennara sem veita leiðsögn í meistaranáminu eru níu doktorsmenntaðir lögfræðingar sem nú starfa við kennslu og rannsóknir innan lagadeildar HR.

Val um áherslur og námsleiðir, sérhæfing
Eitt af megineinkennum meistaranámsins er fjölþætt val um áherslur og námsleiðir, sem veitir mikla möguleika á sérhæfingu innan lögfræðinnar og samþættingu við aðrar háskólagreinar.